حسن شُميس… 5 سنين فالرئاسة: شنو تبدّل عند الصانع التقليدي؟

تيلي آسفي

17 غشت 2021، حسن شُميس شدّ رئاسة غرفة الصناعة التقليدية بجهة مراكش آسفي لولاية ثانية، دازو تقريباً خمس سنين.

خمس سنين كافية باش أي مسؤول يقدر يقول: هادي هي الحصيلة ديالي.

ولكن هنا السؤال لي كايطرح نفسو : شنو دار حسن شوميس فعلاً خلال هاد المدة؟

واش الصانع التقليدي فآسفي اليوم ولا أحسن من قبل؟

واش ولات عندو إمكانية أكبر للتمويل؟

واش تحلات مشاكل التسويق والترويج؟

واش فخار آسفي ولى عندو إشعاع أكبر وطنياً ودولياً؟

واش كاينة مشاريع كبرى دارتها الغرفة وبقات آثارها واضحة على أرض الواقع؟

أكيد كاينين معارض، لقاءات، زيارات واتفاقيات، وكاين حتى انفتاح على التعاون الدولي، خصوصاً فمجال الخزف والفخار. وحسن شوميس سبق ليه طرح أسئلة فمجلس المستشارين ،مثلا مشكل صعوبة ولوج الصناع التقليديين للقروض البنكية.

ولكن السؤال المطروح هو:

واش هاد المبادرات كافية باش نقولو عندنا حصيلة حقيقية؟

حيت الصانع ما باغيش غير يشارك فمعرض و يتصور مع المسؤولين.

الصانع باغي التمويل، باغي فضاء يخدم فيه، باغي التكوين، باغي التسويق، باغي الحماية الاجتماعية، وباغي منتوجو يوصل للأسواق الوطنية والدولية.

وهنا كيبدا النقاش الحقيقي.

شنو هي المشاريع اللي يمكن اليوم نقولو بكل وضوح: هادي من إنجازات فترة حسن شُميس ؟

وشحال صرفات عليها الغرفة؟ وشحال من صانع استفد منها؟ وشنو تبدل بالأرقام؟

ماشي الهدف نهاجمو الرجل، وماشي الهدف نحكمو عليه قبل ما نسمعو الجواب ديالو.

بالعكس، ربما عندو حصيلة مهمة، وربما كاينين مشاريع ما وصلهاش الضوء الإعلامي بالشكل الكافي.

ولكن من حق الصناع والرأي العام يسولو.

حيت المسؤولية ماشي غير انتخابات وأصوات ومناصب… المسؤولية هي الحصيلة.

وبعد قرابة خمس سنوات من الولاية الثانية، السؤال الأكثر إحراجاً ماشي:

“علاش حسن شوميس بقى رئيس؟”

ولكن:

“إيلا طلبنا منو اليوم يقدم لينا حصيلة بالأرقام… شنو غادي يقول لينا؟”

هذا هو النقاش اللي خاصو يتفتح…