المغرب تراجع فترتيب أداء النخب و المسؤولين اللي كيسيرو البلاد

ماشي تقرير على البرلمان بوحدو، وماشي تصنيف ديال السياسيين بالأسماء، ولكن الأرقام اللي خرج بها تقرير جودة النخب العالمي EQx2026 كتفتح نقاش كبير حول شكون كيسير الاقتصاد والسياسة، وشنو القيمة اللي كتترجع فعلاً على المواطن.

التقرير، اللي كيغطي 151 دولة وكيعتمد على 148 مؤشراً، حطّ المغرب فالمركز 92 عالمياً بـ47.2 نقطة، بعدما كان فالمركز 87 السنة اللي فاتت، يعني تراجع بخمس مراتب. والفكرة اللي كيقيسها التقرير بسيطة ولكن ثقيلة: واش النخب كتخلق قيمة حقيقية للمجتمع، ولا كتستافد أكثر من النفوذ والريع؟

واللافت هو أن المغرب جا أحسن فـمؤشر القوة من مؤشر القيمة، وهو فرق كيعطي رسالة واضحة: المشكل ماشي دائماً فغياب النفوذ والإمكانيات، ولكن فكيفاش كتتحول هاد القوة إلى نتائج ملموسة للمجتمع.

بمعنى آخر: إلا كانت النخب قوية، ولكن المواطن ما كيشوفش هاد القوة فالتشغيل، التعليم، الصحة والفرص… فالسؤال اللي كيبقى مطروح هو: شكون كيربح فعلاً؟