6 أشهر ديال الحبس الحبس ل5 ديال الطاكسيات فتطوان بسبب نقل شباب للفنيدق.. والنقابة تندد "الأحكام قاسية"

قررت المحكمة الابتدائية بتطوان الحكم على خمسة من سائقي سيارات الأجرة بستة أشهر ديال الحبس النافذ، بعدما تتابعو بتهمة المساعدة على الهجرة غير النظامية، على خلفية نقل عدد من الشباب لمحيط باب سبتة خلال أحداث محاولة العبور الجماعي الأخيرة.

ومن بعد صدور الأحكام، خرجت النقابة الوطنية لسيارات الأجرة بتطوان ببيان عبرات فيه على رفضها لهاد القرار، واعتبرات أن العقوبات كانت قاسية وما خذاتش بعين الاعتبار طبيعة الخدمة اللي كيقوم بها سائق الطاكسي، ولا الظروف اللي كانت كتعرفها المنطقة فداك الوقت.

وأكدات النقابة أن السائقين كانو غير كيقومو بخدمتهم العادية، وكيقلّو المواطنين من تطوان للفنيدق، خاصة وأنه ما كان حتى قرار رسمي كيمنع التنقل أو كيفرض قيود على نقل الركاب. وأضافت أن السائق ما عندوش الحق يسول الزبون على علاش غادي ولا يفتش هويته، لأن هاد الاختصاص كيبقى من مهام السلطات المختصة.

كما شددت النقابة على أن حرية التنقل مضمونة قانوناً، واعتبرت أن تحميل السائق مسؤولية النوايا ديال الركاب أو الوجهة الحقيقية ديالهم أمر غير منطقي، مطالبة محكمة الاستئناف بإعادة النظر فهاد الأحكام، مع دعوة مختلف الهيئات النقابية والحقوقية للتضامن مع السائقين المتابعين.