إنذار أوروبي: إكتشاف مادة الرصاص في شحنة من الزيتون المغربي

تيلي آسفي

الرصاص ماشي غير مادة ملوِّثة عابرة، و إنما هو معدن ثقيل يقدر يشكل خطراً على صحة الإنسان، خصوصاً إلا كان التعرض ليه بشكل متكرر. ويمكن يأثر على الجهاز العصبي، الكلي، والدم، وتكون آثاره أكثر خطورة عند الأطفال والحوامل.

هاد الموضوع رجع للواجهة من بعد ما رصد النظام الأوروبي للإنذار السريع للأغذية والأعلاف وجود نسب من الرصاص فـ جوج شحنات منفصلة ديال الزيتون الأخضر المغربي منزوع النوى.

الحالة الأولى تسجلات فألمانيا، بعدما دارت السلطات مراقبة رسمية داخل السوق. التحاليل ديال عينة من الشحنة بينات وجود الرصاص بنسبة 0.239 ملغ فالكيلوغرام.

أما الحالة الثانية، فتسجلات فهولندا شهر ماي الماضي، بعدما قامت الشركة المستوردة بفحص داخلي لشحنة أخرى. النتيجة كانت 0.158 ملغ فالكيلوغرام، بينما الحد الأقصى المحدد فالإخطار كان 0.10 ملغ فالكيلوغرام.

المهم هنا أن الأمر ماشي شحنة وحدة تكررات فبلدين، وإنما جوج شحنات مختلفين، واكتشاف التلوث حتى هو كان بطرق مختلفة: وحدة تكتاشفات من خلال مراقبة رسمية، والثانية خلال فحص داخلي للشركة.

هاد المعطيات ما كتعنيش أن الزيتون المغربي كامل فيه الرصاص، وما يمكنش نعممو الحكم على جميع المنتجات والصادرات. ولكن تسجيل جوج حالات فمدة زمنية قصيرة كيبقى موضوع خاصو الانتباه.

والسؤال المهم هنا هو: واش المراقبة قبل تصدير المنتجات الغذائية كافية باش تضمن أن كل شحنة غادية للسوق الأوروبية مطابقة للمعايير؟

حيت فالأخير، القضية ماشي غير ديال تصدير وسوق أوروبي، ولكن مرتبطة قبل كلشي بـ سلامة المنتوج وثقة المستهلك المغربي والأجنبي فيه .