زلزال دبلوماسي فملف الصحراء.. كولومبيا تعترف بسيادة المملكة المغربية على أقاليمها الجنوبية

تيلي آسفي : أحمد الزوبيري

فموقف دبلوماسي قوي ومفاجئ، كولومبيا بدلات موقفها من قضية الصحراء، وأعلنت بشكل واضح اعترافها بسيادة المغرب على صحرائه.

الإعلان جا خلال لقاء جمع وزير الخارجية المغربي ناصر بوريطة مع نائب رئيس كولومبيا خوسيه مانويل ريستريبو، وبحضور وزير العلاقات الخارجية عمر بولا إسكوبار، اللي أكد أن بلادو كتعترف بسيادة المغرب على أقاليمه الجنوبية.

واللي زاد هاد الإعلان أهمية، هو تأكيد بولا إسكوبار على سحب اعتراف كولومبيا بما يسمى “الجمهورية العربية الصحراوية الديمقراطية”، وهو تحول كبير فالموقف الكولومبي من هاد الملف

نائب الرئيس الكولومبي وصف الخطوة بأنها “بداية جديدة” فالعلاقات مع المغرب، وأكد أن المملكة كتعتبر الحليف الرئيسي لكولومبيا فإفريقيا، مع رغبة بوغوتا فإقامة شراكة استراتيجية مع الرباط.

أما ناصر بوريطة، فوصف القرار بأنه “تاريخي”، وقال إنه غادي يعطي دفعة قوية للعلاقات بين البلدين، خصوصاً فالمجال الاقتصادي، مستفيدين من الموقع الاستراتيجي للمغرب فإفريقيا وكولومبيا فأمريكا اللاتينية.

هاد التحول ماشي مجرد خبر دبلوماسي عابر، بل خطوة ممكن يكون عندها تأثير على خريطة المواقف فـأمريكا اللاتينية تجاه قضية الصحراء.

والسؤال اللي غادي يطرح راسو دابا: واش كولومبيا غادي تكون البداية، ودول أخرى فأمريكا اللاتينية غادي تمشي فـنفس الاتجاه؟