اللحم بالبرقوق سيفط 91 أستاذ و أستاذة لمستعجلات الصويرة

الصويرة عاشت واحد الواقعة صحية اللي خلات الاستنفار، بعدما مشاو حوالي 91 أستاذ وأستاذة لقسم المستعجلات بالمستشفى الإقليمي، من بعد ما بانو عليهم أعراض كتتشابه مع التسمم الغذائي.

الأساتذة كانو مشاركين فـ دورة تكوينية حول الأنشطة الموازية بإعداديات الريادة، ضمن برنامج التكوين المستمر، واللي كان كيجمع حوالي 200 شخص.

وحسب المعطيات الصحية المتداولة، الأعراض تمثلات أساساً فـ المغص، آلام البطن، الغثيان، القيء، الإسهال والدوخة، مع التأكيد أن الحالات المسجلة ما كانتش خطيرة، وما كانت حتى حالة استدعات الاستشفاء.

واللي زاد فتح باب التساؤلات هو أن الشبهة، فانتظار نتائج التحاليل والتحريات، كتدور حول بعض مكونات وجبة الغداء، خصوصاً اللحم بالبرقوق وسلطات الخضر النيئة.

لكن إلى حدود هاد المرحلة، ما كاينش تأكيد رسمي بأن هاد الأطباق هي السبب المباشر فالتسمم، خصوصاً وأن التحقيقات والتحاليل المخبرية هي اللي غادي تحسم فالمصدر الحقيقي.

من جهتها، مديرية التعليم بالصويرة أكدت أن الحالة الصحية ديال الأساتذة مستقرة، وأنهم استفدو من الفحوصات والعلاجات الضرورية، كما تم إيفاد لجنة باش توقف على ظروف تقديم الوجبات ومدى احترام شروط السلامة والنظافة.

وفي حالة ما ثبت وجود أي إخلال، فالمصالح المعنية أكدت أنها غادي تتخذ الإجراءات الإدارية والقانونية والتعاقدية اللازمة فحق مزود خدمات التغذية.

السؤال اللي باقي مطروح: شنو كان السبب الحقيقي وراء هاد التسمم الجماعي؟ والجواب غادي تحسم فيه نتائج التحريات والتحاليل.