8 غشت , اليوم العالمي للقطط كيفاش غا نحتفلوا ؟

تيلي آسفي : أحمد الزوبيري

اليوم ماشي ضروري نحتافلو بالقطط بالحلوى ولا بالصور والستوريّات… يمكن أحسن احتفال نديروه هو ببساطة: نراعيوها، نحترموها وما نأذيوهاش. 🐱

القطط مخلوقات كتعيش معانا فالدرب، فالزنقة وحتى فالديور، وكتحتاج غير شوية ديال الرحمة: الماكلة، الماء، العلاج ملي تمرض، والأهم أنها ما تتعرضش للعنف ولا للأذى.

وحتى دين الإسلام عطى أهمية كبيرة للرفق بالحيوان. ومن أشهر القصص اللي جات فالسنة النبوية قصة المرأة اللي دخلات النار بسبب هرة حبساتها، لا هي وكلاتها ولا خلاتها تاكل من حشاش الأرض.

المعنى واضح: الحيوان ماشي لعبة وماشي مخلوق نقدروا نعذبوه بلا حساب.

والرحمة ما كتوقفش هنا. الرسول ﷺ قال: «في كل كبد رطبة أجر»، يعني الإحسان للحيوان حتى هو باب من أبواب الأجر.

ومن هنا، اليوم العالمي للقطط يقدر يكون فرصة باش نراجعو الطريقة اللي كنتعاملو بها مع هاد المخلوقات، خصوصاً القطط اللي عايشة فالشارع وكتواجه الجوع والمرض والدهس والعنف.

أما الجمعيات اللي كتدافع على الحيوانات، فالمطلوب ماشي غير حملات موسمية، ولكن كذلك قوانين أوضح، حماية أقوى، وتطبيق فعلي للعقوبات ضد أي شخص كيعذب أو كيؤذي الحيوانات.

حيت الاحتفال الحقيقي ماشي أنك تصور مع مشّ وتنشر الصورة…

الاحتفال الحقيقي هو أنك تشوف مشّ ضعيف فالزنقة وما تأذيهش، وإذا قدرت تعاونو…عاونو .

فـ8 غشت، خلينا نحتافلو بالقطط بطريقة بسيطة:

نخليوها تعيش في سلام.